HISTORIKU I AKREDITIMEVE TË LABORATORËVE ISUV-SË

Hartimi dhe implementimi i sistemit të Menaxhimit të Cilësisë të ISUV, sipas normës EN ISO 17025:2005, ka filluar që në vitin 2007 në përputhje me kërkesat e normës për akreditimin e laboratorëve testues.

Referuar Objektivave të paracaktuara nga Ministria e Linjës, u punua me disa laboratorë që operonin në fushën e Sigurisë Ushqimore, me qëllim mbështetjen e eksporteve në ato produkte që kishte interes tregu. Kostot në burime, si materiale dhe njerëzore ishin të konsiderueshme për laboratorët që u bënë objekt akreditimi.

Procedura për akreditim iu drejtua, trupës shqiptare akredituese -Drejtorisë së Përgjithshme të Akreditimit (DPA), si i vetmi ent akreditues në Republikën e Shqipërisë.

Akreditimi i parë u finalizua me akreditim e 6 testeve: 2 Teste Mikrobiologjike (“Metoda horizontale për zbulimin e Salmonella spp. në molusqe bivalve” dhe “Metoda horizontale e përcaktimit të Escherichia coli β-glucuronidase pozitive në molusqe bivalve”), 3 teste për përcaktimin e Biotoksinave (“Përcaktimi i biotoksinës ASP në molusqe bivalve me HPLC-DAD” dhe “Përcaktimi i biotoksinave DSP, PSP- metoda biologjike”) dhe 1 test për Fitoplanktonin (“Vlerësimi sasior dhe përbërja taksonomike e fitoplanktonit në ujë”).

Të gjitha teknikat e akredituara ishin dhe janë konformë me legjislacionin e BE-së.

Meqënëse, Drejtoria e Përgjithshme e Akreditimit, në atë periudhë nuk ishte nënshkruese e EA – MLA (Organizata Europiane e Akreditimit) dhe akreditimi i dhënë prej tyre nuk siguronte njohje ndërkombëtare të kompetencës së laboratorëve të ISUV-së u vendos që kërkesa për akreditim t’i drejtohej dhe një Trupe të huaj akreditimi, anëtare e BE.

Në shkurt të vitit 2012 u arrit akreditimi nga Trupa Italiane Akredituese (ACCREDIA) për të njëjtat teste (6 testet e sipërpërmendura), që ishin akredituar nga DPA. ISUV në këtë periudhë ishte i vetmi institucion jo italian jashtë Italisë i akredituar nga ACCREDIA, një nga 8 Trupat Akredituese me prestigjoze te Europës.

Akreditimi nga dy Trupat Akredituese është mbajtur deri në vitin 2016, sepse më pas Drejtoria e Përgjithshme e Akreditimit bëhet nënshkruese e EA – MLA, marrëveshje e njohjes reciproke, në fushën e laboratorëve testues.

Ndër vite është punuar jo vetëm për mirëmbajtjen por dhe për zgjerimin e akreditimeve:

• në vitin 2013 u akreditua Laboratori i Histaminës me një test “Përcaktimi i Histaminës në produktet iktike me HPLC-DAD”;

• në vitin 2015 u akreditua Laboratori i Mbetjeve të Medikamenteve Veterinare me 1 test (Përcaktimi i mbetjeve të nikarbazinës në vezë me HPLC-DAD) dhe Laboratori i

Pesticideve Shtazore me 1 test (Përcaktimi i mbetjeve të pesticideve në vezë, qumësht me GC/MS/MS (Metoda SweEt).

• në vitin 2018 fusha e akreditimit u zgjerua me 45 teste të reja, ku për herë të parë u akredituan laboratorë që operojnë në fushën e Diagnozës Veterinare (shih listen e testeve të akredituara);

• në vitin 2020 fusha e akreditimit u zgjerua me 42 teste të reja, duke e çuar në total listen e testeve të akredituara në 95 teste sipas standardit ISO/IEC 17025:2017 (shih listen e testeve të akredituara).

Referuar strukturës së ISUV-së, aktualisht të përfshirë në akreditim janë: Katër Departamente, 10 Sektorë, 13 Laborator dhe rreth 30 Specialistë.